Fanella e veshur nga Diego Maradona kur shënoi golin e tij të famshëm “Hand of God” kundër Anglisë në Kupën e Botës në vitin 1986 u shit në ankandin Sotheby’s në Londër të mërkurën për një çmim rekord botëror prej 9.28 milionë dollarë.
Rekordin e mëparshëm e mbante fanella e Babe Ruth të cilën e veshi gjatë sezoneve të tij 1928-1930 me New York Yankees dhe e cila u shit 5.64 milionë dollarë në vitin 2019.
Rekordi për një pjesë të kujtimeve sportive u vendos gjithashtu në vitin 2019, kur një manifest origjinal olimpik i vizatuar me dorë u shit në Nju Jork për 8.8 milionë dollarë.
Goli i famshëm “Hand of God” u shënua nga Maradona, i cili në fakt e hodhi topin me dorë mbi portierin anglez Peter Shilton dhe në rrjetë në ndeshjen çerekfinale të Kupës së Botës të vitit 1986 kundër Anglisë, e cila u fitua me rezultat 2-1 nga Argjentina. Arbitri nuk e pa, kështu që goli qëndroi.
Pas ndeshjes, Maradona tha: “Goli u shënua pak me kokën e Maradonës dhe pak me dorën e Zotit”.
Si rezultat, Argjentina fitoi Botërorin e dytë dhe të fundit deri më sot. Maradona, i cili ishte 25-vjeçar atë kohë, ishte kapiteni i Argjentinës kur ndihmoi kombin e tij të fitonte Kupën e Botës FIFA 1986. Ai luajti për Boca Juniors të Argjentinës, klubet spanjolle Barcelona dhe Sevilla dhe klubin italian Napoli.
Maradona, i cili vdiq nga problemet me zemër më 25 nëntor të vitit 2020, konsiderohet si një nga lojtarët më të mëdhenj të futbollit ndonjëherë./UBTNews/