Oficerët doganor kanë parandaluar sot futjen ilegale të 4000 copë fishekve në pikëkalimin kufitar të Jarinjes.
Sipas doganës, gjatë kontrolleve rutinore të automjeteve në hyrje, oficerët kanë gjetur municione të fshehura në bagazh në një automjet me targa të Serbisë, ku më pas menjeherë në bashkëpunim me policinë e Kosovë është bërë arrestimi i drejtuesit të makinës.
“Kontrolli detal ka zbuluar municion si në vijim 39 pako x 50 copë të llojit AUTO FMT 71gr/4.6gr gjithsej 1950 cope, 41 pako x 50 copë të llojit 9mm LUGER FMJ 124gr/8.0gr gjithsej 2050 copë. Gjithsejtë 4000 copë. Rasti i është dorëzuar Policisë së Kosovës për hetime të mëtejme”, thuhet në njoftim.
Dogana e Kosovës thotë se në bashkëpunim me autoritetet kompetente do të vazhdojë të ushtroj kontrolla në kuadër të realizimit të detyrave dhe përgjegjësive të saj, me qëllimin e vetëm parandalimin e veprimtarive ilegale në të gjithë territorin e Republikës së Kosovës.