Kryefjala e javëve të fundit në fjalorin politik dhe ekonomik është “incenerator”. Përtej akuzave ekonomiko-politike, përdorimi i këtij emri nuk shkon me gjuhën shqipe. A mjafton vetëm përkthimi inceneratorit si djegës apo impiant i përpunimit të mbetjeve?
Për zgjidhjen më të mirë sytë i kemi nga gjuhëtarët. “Incenerator? Kemi fjalët shqip, mund ta quanim djegtore ose shkrumbore, ky është procesi real i zhvillimit gjuhësor”, thotë gjuhëtari Xhevat Lloshi.
Ky është vetëm një shembull nga plot të tjerë që po rrezikojnë shqipen tonë, të cilat u vunë në dukje nga në ditën ndërkombëtare të gjuhës amtare, prej gjuhëtarëve, studiuesve, përkthyesve e pedagogëve. Përdorimi i dygjuhësisë, duke mos ruajtur fjalën shqipe, është një tjetër dëm që i bëhet gjuhës amtare.
“Shqiptarët duhet ta dinë që influencë do të thotë ndikim, fjala trend është prirje, përdor anglishten por specifiko shqipen. Kemi stadiumin më të mirë në Shqipëri që quhet Air Albania Arena, ku është shqipja?”, shton sërish Lloshi.
Për mbrojtjen e shqipes institucionet duhet të jenë më fanatikët në ruajtjen e saj. Apel i posaçëm ju drejtua gazetarëve për ruajtjen e gjuhës sonë standarde në të shkruar dhe në të folur, veçanërisht në këto kohë kur media ka dalë përtej kufijve të saj tradicionalë, në një hapësirë të pamatë online, për të cilën gjithashtu këshillohet gjetja e fjalëve të barasvlershme në shqip.