Irani paralajmëroi Francën të mërkurën se do të kundërpërgjigjej, pasi karikaturat “fyese” që përshkruanin liderin suprem të Iranit, Ayatollah Ali Khamenei, u botuan në revistën satirike Charlie Hebdo.
E përjavshmja kishte botuar dhjetëra karikatura në të njëjtën ditë duke tallur figurën më të lartë fetare dhe politike në Republikën Islamike.
Revista tha se karikaturat ishin pjesë e një konkursi që filloi në dhjetor në mbështetje të protestave të shkaktuara nga vdekja në paraburgim e Mahsa Aminit, një iraniano-kurdeje e cila u arrestua për shkeljen e kodit të rreptë të veshjes së vendit për gratë.
“Akti fyes dhe i pahijshëm i një botimi francez në botimin e karikaturave kundër autoritetit fetar dhe politik nuk do të kalojë pa një përgjigje efektive dhe vendimtare”, shkroi në Twitter ministri i Jashtëm i Iranit, Hossein Amir-Abdollahian.
“Ne nuk do të lejojmë që qeveria franceze të shkojë përtej kufijve të saj. Ata definitivisht kanë zgjedhur rrugën e gabuar”.
Revista franceze tha se konkursi kishte për qëllim “të mbështeste luftën e iranianëve që po luftojnë për lirinë e tyre”.
Autoritetet iraniane thonë se qindra njerëz, përfshirë anëtarë të forcave të sigurisë, janë vrarë dhe mijëra janë arrestuar në ato që ata i përshkruajnë si “trazira” dhe kanë akuzuar fuqitë e huaja armiqësore dhe grupet opozitare për nxitjen e trazirave./UBTNews/