Ka qenë një javë sfiduese për skuadrën spanjolle që të dielën do të ndeshet me Barcelonën në një nga “El Clásico-t” më të pritura të viteve të fundit. Në fakt, nëse Barcelona shmang humbjen kundër ekipit të drejtuar nga Alvaro Arbeloa, “Blaugranat” do të shpallen kampionë të La Ligës.
Pavarësisht ndeshjes vendimtare që po afrohet, tifozët e Madridit nuk kanë gjetur qetësi, pasi ngjarjet jashtë fushës kanë rritur nivelin e stresit, duke filluar me dramën e fundit mes mesfushorëve Federico Valverde dhe Aurelien Tchouameni.
Përleshje mes lojtarëve
Mesfushorët e Real Madridit, Valverde dhe Tchouameni, u përfshinë në dy përleshje fizike të ndara të mërkurën dhe të enjten, sipas raporteve të shumta. Mesfushori uruguaian raportohet se ka pasur nevojë për trajtim spitalor dhe qepje pas këtyre incidenteve.
Real Madridi i ka pranuar raportimet dhe ka lëshuar deklaratën vijuese:
“Real Madrid C.F. njofton se, pas incidenteve të ndodhura këtë mëngjes gjatë seancës stërvitore të ekipit të parë, ka vendosur të hapë procedura disiplinore ndaj lojtarëve tanë Federico Valverde dhe Aurélien Tchouameni. Klubi do të ofrojë përditësime mbi vendimet e të dyja procedurave sapo të përfundojnë proceset përkatëse të brendshme.”
Tensionet duket se janë bartur nga incidenti i parë, pasi Valverde thuhet se refuzoi t’i jepte dorën Tchouamenit pas një ndërhyrjeje të ashpër nga francezi gjatë stërvitjes së të mërkurës. Kjo i parapriu një seance të mbushur me tension. Në një lëvizje të paprecedentë, e gjithë skuadra mbeti në qendrën stërvitore për një mbledhje urgjente të “kabinetit të krizës”, sipas raportimeve. Asnjë lojtar nuk u lejua të largohej derisa situata u zgjidh brenda familjes, me presidentin e Real Madridit, Florentino Perez, të përfshirë personalisht në procesin e vendimmarrjes.
Cadena SER raportoi se Valverde pësoi një lëndim në kokë gjatë njërës prej përplasjeve me mesfushorin francez dhe u desh të largohej nga qendra stërvitore e Real Madridit me karrocë invalidësh. Më vonë të enjten, Real Madridi konfirmoi lëndimin në kokë të mesfushorit uruguaian përmes një tjetër deklarate zyrtare:
“Pas testeve të kryera sot mbi lojtarin tonë Fede Valverde nga Shërbimet Mjekësore të Real Madridit, ai është diagnostikuar me një traumë kranioencefalike. Valverde ndodhet në shtëpi në gjendje të mirë dhe do t’i duhet të pushojë për 10 deri në 14 ditë, siç parashihet nga protokollet mjekësore për këtë diagnozë.” /CBS/