Shqipëria ka plotësuar të gjitha kushtet për hapjen e negociatave të anëtarësimit në BE, tha të premten Presidenti i Këshillit Europian, Charles Michel.
“Bisedimet e anëtarësimit duhet të fillojnë sa më shpejt që të jetë e mundur”, tha Michel.
Deklaratat e tij erdhën në një konferencë shtypi me kryeministrin Edi Rama në kryeqytetin e Shqipërisë, Tiranë, gjatë ndalesës së tij të dytë në një turne në vendet e Ballkanit Perëndimor.
Michel tha se BE-ja po punon për të siguruar përfitime të prekshme për të gjithë shqiptarët dhe partnerët në rajon.
”Kjo do të thotë të përshpejtojmë integrimin tani në vend që të presim derisa negociatat e anëtarësimit të përfundojnë plotësisht. Në qershor, do të organizojmë një takim të 27 liderëve të BE-së në Bruksel me ju dhe liderët e tjerë të Ballkanit Perëndimor”, shtoi Michel, i cili theksoi se Shqipëria është pjesë e familjes europiane.
“BE mbetet partneri më i madh tregtar i Shqipërisë dhe ofruesi më i madh i asistencës financiare. Është më e rëndësishme se kurrë që të ringjallet procesi i zgjerimit. Sfidat e sotme na detyrojnë të mendojmë përtej modeleve tradicionale për mënyra novatore të të menduarit dhe mënyra novatore të punës, dhe krijimi i stimujve të rinj për reformat për të përshpejtuar integrimin në BE”, përfundoi ai. /UBTNews/