Babai i yllit Britney Spears, Jamie Spears është urdhëruar të paraqitet në gjykatë për t’u marrë në pyetje lidhur me dyshimet se ka përgjuar vajzën e tij. Atij iu kërkua të paraqitet brenda 30 ditësh dhe duhet t’i paraqesë të gjitha dokumentet e kërkuara nga avokatët e këngëtares. Një gjykatës e dha urdhrin gjatë një seance dëgjimore në Los Angeles të mërkurën.
Babai i Spears ka mohuar më parë të gjitha akuzat se ai e spiunoi atë duke përdorur pajisje sekrete regjistrimi të fshehura në dhomën e saj të gjumit gjatë kujdestarisë, duke thënë se pretendimet janë “të rreme”.
Avokati i yllit, Matthew Rosengart u tha gazetarëve jashtë gjykatës pas seancës: “Sot ishte një ditë shumë e mirë në gjykatë për Britney Spears dhe ishte një ditë shumë e mirë për drejtësinë”.
Britney u lirua nga kujdestaria, e cila i lejoi babait të saj dhe të tjerëve të kontrollonin jetën dhe financat e saj për gati 14 vjet, në nëntor të vitit të kaluar./UBTNews/