Nënsekretari i Përgjithshëm i Kombeve të Bashkuara për Operacionet e Paqes, Jean-Pierre Lacroix, i shoqëruar nga Përfaqësuesi i Posaçëm i Sekretarit të Përgjithshëm, Peter Due, ka zhvilluar takime zyrtare në Prishtinë me Kryeministrit në detyrë, Albin Kurti, dhe ushtruesin e detyrës së Ministrit të Punëve të Jashtme dhe Diasporës, Glauk Konjufca.
Gjatë kësaj vizite dy ditore, e cila është e dyta e Lacroix në Kosovë brenda tre vjetësh, zyrtari i OKB-së ka takuar gjithashtu edhe përfaqësues të komunitetit diplomatik dhe të organizatave ndërkombëtare. Përmes një njoftimi për media nga UNMIK-u, bëhet e ditur se në takime u diskutua për mbarëvajtjen e proceseve dhe për rëndësinë e bashkëpunimit institucional.
“Diskutimet njohën përpjekjet e vazhdueshme të Kosovës dhe progresin e arritur, duke nënvizuar rëndësinë e dialogut dhe bashkëpunimit të vazhdueshëm”, thuhet në njoftimin e zyrtar të UNMIK-ut.
Në kuadër të këtyre takimeve, Lacroix ka rikonfirmuar mbështetjen e plotë për procesin e dialogut të lehtësuar nga Bashkimi Evropian.
Gjithashtu, sipas njoftimit, nënsekretari Lacroix “theksoi përkushtimin e vazhdueshëm të UNMIK-ut për forcimin e sundimit të ligjit, promovimin e të drejtave të njeriut dhe mbështetjen e ndërtimit të besimit midis komuniteteve”.
/E.A/
