Punonjësit e sektorit publik në Greqi, mund të ftohin zyrat e tyre vetëm në 26 gradë Celsius, pasiqë Athina kërkon të reduktojë kostot e sektorit publik për shkak të krizës energjetike.
Duke hyrë në fuqi menjëherë, termostatet e kondicionerëve nuk mund të vendosen më më poshtë se ajo temperaturë, tha të enjten ministri grek i Energjisë, Kostas Skrekas, për radion shtetërore.
Zyrtarët gjithashtu duhet të zvogëlojnë ndriçimin e rrugëve në minimumin absolut të nevojshëm, tha ai.
Njoftimi vjen teksa qeveria kërkon të ulë me 10% kostot e energjisë në sektorin publik në krahasim me një vit më parë.
Autoritetet dhe bashkitë që nuk arrijnë të përmbushin objektivin duhet të paguajnë vetë energjinë e tepërt duke përdorur para nga pjesët e tjera të buxhetit të tyre.
Kriza energjetike i ka bërë masat urgjentisht të nevojshme, tha ai, duke vënë në dukje se kostot vjetore për klimatizimin dhe ndriçimin e rrugëve në sektorin publik arrijnë në 800 milionë euro (850 milionë dollarë).
Skrekas këshilloi gjithashtu qytetarët që në muajt në vijim të zëvendësojnë çdo kondicioner dhe frigorifer të vjetër me pajisje të reja të kursimit të energjisë, përmes një programi të financuar nga shteti dhe Bashkimi Evropian.
Një zëdhënës i Ministrisë së Financave tha se procesi i aplikimit do të jetë i drejtpërdrejtë dhe online. /UBTNews/