Në një performancë të jashtëzakonshme këtë javë, Milot Rashica ka bërë përshtypje me paraqitjen e tij me fanellën e Besiktasit, pavarësisht se skuadra e tij nuk arriti të sigurojë fitore.
Ylli kosovar luajti 67 minuta në derbin e nxehtë ndaj Trabzonspor, një ndeshje që përfundoi në barazim 1-1. Edhe pse Besiktasi nuk arriti të merrte tre pikë, performanca e Rashicës u dallua për kontributin e tij të rëndësishëm në fushë.
Anësori vushtrrias pati 59 prekje të topit gjatë ndeshjes dhe ishte aktiv në krijimin e mundësive për skuadrën e tij. Ai dha tre pasime kyçe dhe krijoi një rast të madh për shënim, duke e bërë ndikimin e tij të ndjeshëm në lojë. Rashica gjithashtu fitoi gjashtë nga nëntë duelet e tij dhe realizoi dy spastrime dhe tre ndërhyrje të sakta në mbrojtje.
Pavarësisht se nuk shënoi dhe nuk dha asistime në këtë ndeshje, paraqitja e tij e shkëlqyer u vlerësua lart nga platforma e analizës së statistikave SofaScore, e cila e përzgjodhi atë në formacionin e xhiros së pestë në Superligën e Turqisë.
Në këtë edicion të Superligës, Rashica ende nuk ka arritur të shënojë një gol, por ka kontribuar me dy asistime, duke treguar se është një lojtar i rëndësishëm për Besiktasin dhe një prej emrave më të spikatur në kampionatin turk./UBTNews/
