Së fundmi ka pasur spekulime se Raphinha mund të rikthehet në Premier Ligë, pasi që Barcelona mund ta shesë yllin brazilian për të rikuperuar fonde, për ta mundësuar kthimin e Lionel Messit në “Camp Nou”.
Besohet se interesim në Raphinhan kanë shprehur Arsenali dhe skuadra e Newcastle United, kështu që merkatoje verore do të qartësojë më së miri të ardhmen e yllit brazilian.
Tani, trajneri i Barcelonës, Xavi ka folur për situatën e Raphinhas, për të cilin tha se është duke e pasur një sezon tejet të mirë.
“Jam tejet i lumtur me Raphinhan. Ai po kalon një sezon të shkëlqyer me golat e tij dhe punën që po e bën. Ai dëshiron të jetë perfekt, kështu që ndonjëherë mund të ketë zemërim. Ai gjithmonë punon me mendjen e duhur për të pasur sukses”, tha Xavi.
Në 43 paraqitje në të gjitha garat këtë sezon për Barcelonën, Raphinha ka regjistruar nëntë gola dhe 10 asistime mbi emrin e tij.