Rafael Nadal pranoi të dielën se karriera e tij e ndjekur nga dëmtimet e ka detyruar atë të mendojë se “çdo ndeshje që luaj këtu mund të jetë e fundit”.
35-vjeçari spanjoll kaloi për herë të 16-të në çerekfinalet e French Open me një fitore epike 3-6, 6-3, 6-2, 3-6, 6-3 ndaj kanadezit Felix Auger-Aliassime në një ndeshje që zgjati katër orë e 21 minuta.
Ai do të takohet me numrin një të botës në tenis, Novak Gjokoviç për herë të 10-të në Roland Garros dhe i 59-ti në përgjithësi në një rivalitet që shtrihet që nga viti 2006.
Nadal mbërriti në Paris i pasigurt nëse do të ishte në gjendje të merrte pjesë pasi pësoi një rishfaqje të një dëmtimi kronik të këmbës, dëmtim ky që e ka penguar atë për pjesë të mëdha të karrierës së tij.
Vitin e kaluar, ai humbi Wimbledon, Olimpiadën dhe US Open vetëm për t’u rikuperuar.
“E di situatën time dhe e pranoj. Nuk mund të ankohem shumë. Jam në çerekfinale të Roland Garros. Dy javë e gjysmë më parë nuk e dija nëse do të isha këtu”, tha Nadal.
“Për të qenë i sinqertë, çdo ndeshje që luaj këtu, nuk e di nëse do të jetë ndeshja ime e fundit në Roland Garros në karrierën time të tenisit”.
“Kalova përsëri një proces të vështirë me këmbën time, kështu që nuk e di se çfarë mund të ndodhë në të ardhmen e afërt me karrierën time”./UBTNews/