Ka hyrë në fuqi në shtetin e Teksasit një ndër ligjet më të ashpra kundër abortit. Ligji i ri e ndalon kryerjen e kësaj procedure pas javës së gjashtë të shtatzënisë.
Më saktësisht, me ligjin e ri ndalohet kryerja e abortit pasi të jetë vërejtur e rrahura e zemrës së fetusit, diçka që autoritetet shëndetësore e cilësojnë si çorientuese.
Ligji, që është një ndër më të rreptit për këtë çështje në Shtetet e Bashkuara, hyri në fuqi pasi Gjykata Supreme nuk iu përgjigj një ankese urgjente nga ata që ofrojnë kryerje të aborteve.
Mjekët dhe grupet për të drejtat e grave e kanë kritikuar ashpër ligjin e ri. Ai u jep të drejtë të gjithë qytetarëve që t’i padisin mjekët që kryejnë aborte pas javës së gjashtë të shtatzënisë, shkruan BBC.
Ligji i ashtuquajtur “Akti i Rrahjes së Zemrës” u nënshkrua në maj nga guvernatori i Teksasit, Greg Abbott, shkruan BBC, transmeton Gazeta Express.
Përjashtim nga zbatimi i këtij ligji përbëjnë vetëm rastet e urgjencës mjekësore, të cilat duhet të jenë të vërtetuara me shkrim nga një mjek.
Gratë e Teksasit që duan të kryejnë abort pas javës së gjashtë të shtatzënisë do të jenë të detyruara që të udhëtojnë jashtë këtij shteti, mesatarisht 399 kilometra.