Sipas një sondazhi të realizuar nga YouGov, rreth 34% e banorëve në Gjermani shprehen shqetësim për humbjen e vendit të punës për shkak të zhvillimeve në fushën e Inteligjencës Artificiale (AI). Nga ana tjetër, 62% e të anketuarve nuk kanë frikë nga kjo perspektivë.
Në studim, që përfshiu 2,175 pjesëmarrës gjatë mesit të gushtit, nuk u vunë re ndryshime të mëdha në shqetësimet e qytetarëve sipas përkatësisë politike. Megjithatë, punëtorët në zona urbane dhe ata me nivel më të ulët arsimimi rezultuan më të prirur të ndihen të pasigurt për të ardhmen e tyre në punë për shkak të AI.
Një studim tjetër nga Instituti i Kërkimeve Ekonomike Ifo, i publikuar në qershor, tregon se 27% e kompanive gjermane parashikojnë humbje të vendeve të punës në pesë vitet e ardhshme për shkak të automatizimit dhe përdorimit të AI-së. Vetëm 5% presin krijimin e vendeve të reja, ndërsa shumica, rreth dy të tretat, nuk presin ndryshime të mëdha.
Që prej prezantimit të modelit të madh të gjuhës ChatGPT nga OpenAI në nëntor 2022, zhvillimet në këtë fushë kanë avancuar me ritme të shpejta. Modelet e reja të AI-së kanë përmirësuar ndjeshëm aftësinë për të përpunuar tekst, imazhe, audio dhe video në të njëjtën kohë, duke hapur mundësi të reja, por edhe sfida në tregun e punës.
