Siria mohoi të mërkurën se po mbante gazetarin amerikan, Austin Tice, ose amerikanë të tjerë pasi presidenti Joe Biden akuzoi qeverinë siriane për arrestimin e tij.
Ministria e Jashtme siriane tha në një deklaratë se Damasku “mohon se ka rrëmbyer ose po mban ndonjë shtetas amerikan në territoret e tij”.
“Shtetet e Bashkuara lëshuan javën e kaluar deklarata mashtruese dhe të palogjikshme nga presidenti dhe sekretari amerikan i shtetit që përfshinin akuza të pabaza kundër Sirisë se kishte rrëmbyer ose arrestuar shtetas amerikanë, përfshirë ish-marinsin amerikan Austin Tice”, thuhet në deklaratë.
Komentet e Bidenit javën e kaluar erdhën në një deklaratë të lëshuar nga Shtëpia e Bardhë për të shënuar 10 vjetorin e rrëmbimit të Tice, i cili ndodhi kur ai ishte në Siri duke mbuluar konfliktin e saj të gjatë. Vërejtjet e Biden ishin treguesi më i qartë se SHBA-ja është e sigurt se Tice po mbahet nga qeveria e Presidentit Bashar Assad.
“Ne e dimë me siguri se ai është mbajtur nga qeveria e Sirisë”, tha Biden në deklaratën e tij javën e kaluar. “Ne i kemi kërkuar vazhdimisht qeverisë së Sirisë që të punojë me ne në mënyrë që të mund ta sjellim Austin në shtëpi”.
Zëdhënësi i Departamentit të Shtetit, Ned Price, u tha gazetarëve të martën se qeveria amerikane e ka shtyrë Sirinë të kthejë çdo amerikan. Në mënyrë specifike për rastin e Tice, tha ai, administrata Biden është “angazhuar gjerësisht me zyrtarët sirianë dhe përmes palëve të treta”./UBTNews/