Shoqata e Tenisit të Grave do të pezullojë të gjitha turnetë në Kinë dhe në Hong Kong, në përgjigje të trajtimit të vendit ndaj akuzave për sulm seksual të Peng Shuai-t dhe shqetësimeve se ajo është censuruar, përcjell UBT News.
Tenistja Shuai kishte akuzuar një ish-zyrtar të qeverisë kineze për sulm seksual në një postim në mediat sociale në nëntor, i cili u fshi nga autoritetet kineze.
“Ndërsa ne tani e dimë se ku është Peng, unë kam dyshime serioze se ajo është e lirë, e sigurt dhe nuk i nënshtrohet censurës, shtrëngimit dhe frikësimit”, tha në një deklaratë presidenti dhe themeluesi i WTA, Steve Simon.
“WTA ka qenë e qartë për atë që nevojitet këtu dhe ne përsërisim thirrjen tonë për një hetim të plotë dhe transparent – pa censurë – në akuzën për sulm seksual të Peng Shuai-t”.
Bashkimi Evropian i ka bërë thirrje Kinës të tregojë “prova të verifikueshme” se Shuai është e sigurt, duke shtuar se rishfaqja e saj publike nuk i ka lehtësuar shqetësimet për sigurinë e lojëtares./UBTNews/