Me një rast të konfirmuar dhe gjashtë të tjerë të dyshuar me lijën e majmunit në ShBA, zyrtarët nga Qendrat për Kontrollin dhe Parandalimin e Sëmundjeve thonë se rreziku mbetet i ulët dhe nuk ka asnjë provë që virusi ka evoluar për të qenë më i transmetueshëm.
“Ky nuk është COVID”, tha Jennifer McQuiston, zëvendësdrejtoreshë e Divizionit të Patogjenëve dhe Patologjisë me Pasoja të Larta në CDC, gjatë një konference për media të hënën.
Ekziston një rast pozitiv i konfirmuar në Massachusetts kurse një rast pozitiv i supozuar në Nju Jork, një në shtetin Uashington, dy në Utah dhe dy në Florida.
CDC tha të hënën se qeveria është në procesin e lëshimit të disa vaksinave nga rezervat e saj kombëtare. Nuk ka nevojë për të vaksinuar publikun e gjerë kundër lisë së majmunit, thanë zyrtarët. Përkundrazi, ato vaksina do të përdoren në një numër të vogël njerëzish që kanë qenë të ekspozuar.
Megjithatë, zyrtarët e CDC paralajmëruan se ka të ngjarë të ketë më shumë raste, dhe agjencia tani po rrit ndërgjegjësimin tek burrat që identifikohen si homoseksualë ose biseksualë.
“Unë mendoj se ne duhet t’i kushtojmë vëmendje komuniteteve në të cilat kjo mund të qarkullojë, në mënyrë që të mund të komunikojmë në mënyrë efektive me ta dhe të ndihmojmë për ta vënë nën kontroll këtë shpërthim”, tha McQuiston
Lija e majmunëve nuk është një infeksion seksualisht i transmetueshëm dhe çdokush mund të infektohet pavarësisht orientimit seksual.
Virusi, transmetohet përmes kontaktit të ngushtë me një person tjetër, përfshirë përqafimin, prekjen ose kontaktin e zgjatur ballë për ballë.
Një grup i hershëm i rasteve të lisë së majmunëve në Londër ishte mes një familjeje bërthamore që jetonte në të njëjtën shtëpi.
“Çdokush mund të zhvillojë dhe përhapë infeksionin e lisë së majmunit. Por, shumë nga ata që janë prekur nga shpërthimi aktual global identifikohen si burra homoseksualë dhe biseksualë. Ne duam t’i ndihmojmë njerëzit të marrin vendimet më të mirëinformuara për të mbrojtur shëndetin e tyre”, tha Dr. John Brooks, epidemiolog mjekësor, Divizioni i Parandalimit të HIV/AIDS në CDC.
Në mënyrë të veçantë, CDC tani po paralajmëron njerëzit që të kenë kujdes për një skuqje të veçantë në rajonin gjenital, i cili mund të ngatërrohet me një IST. /UBTNews/