Një rregullator i qarkut kinez tha se po kryen inspektime në 45 dyqane Pizza Hut në Pekin, pasi njëra u akuzua nga media për shkelje të sigurisë ushqimore.
Rregullatori i tregut të distriktit Haidian të Pekinit tha vonë të mërkurën se kishte vizituar degën në fjalë dhe kishte parë të dhënat e blerjeve të materialeve ushqimore, ruajtjes dhe datat e skadencës.
Zinxhiri i drejtuar nga Yum China, u vu nën vëzhgim në fillim të kësaj jave pasi Beijing News raportoi se dy nga dyqanet e tij në Pekin, duke përfshirë atë në rrethin Haidian, dyshohet se kishin data të rreme skadence në produkte dhe kishin ripërdorur vaj gatimi për 10 ditë.
Pizza Hut tha se kishte pezulluar funksionimin e dy pikave dhe ishte duke kryer hetimin e saj.
“Ne i kushtojmë rëndësi të madhe çështjeve të raportuara nga mediat”, tha ajo në llogarinë e saj në Weibo të mërkurën. Ajo nuk pranoi të jepte komente të mëtejshme.
Inspektimet vijnë disa muaj pasi një degë tjetër e Pizza Hut në Pekin u gjobit me 50 mijë juanë (shtatë mijë e 394 dollarë) nga autoritetet e tregut të qarkut Fengtai për përdorimin e materialeve ushqimore të skaduara. Pizza Hut ka mbi dy mijë e 600 dyqane në Kinë.
Konsumatorët dhe mediat kineze janë bërë gjithnjë e më të ndjeshme në lidhje me të drejtat e konsumatorëve dhe sigurinë ushqimore pas një sërë skandalesh, dhe mbajnë një sy të ngushtë në sjelljen e markave të mëdha, veçanërisht ato nga jashtë.
Rregullatorët e tregut në tetë qytete kineze kryen inspektime të dyqaneve të Starbucks pasi zinxhiri i kafesë në ShBA tha në dhjetor se kishte gjetur probleme të sigurisë ushqimore në dy pika. /UBTNews/