Më 6 shkurt 1967, diktatori Enver Hoxha mbajti një fjalim që shënoi fillimin e luftës kundër fesë në Shqipëri, duke çuar në një periudhë të rëndë persekutimi fetar. Autoriteti për Informim mbi Dokumentet e ish-Sigurimit të Shtetit rikujtoi këtë ngjarje historike, e cila nisi me shpalljen e “Revolucionarizimit të mëtejshëm të partisë dhe pushtetit” dhe u pasua me një fushatë të egër kundër fesë dhe klerit.
Pas këtij fjalimi, regjimi komunist shkatërroi më shumë se 2 mijë objekte të kultit dhe persekutoi besimtarët e të gjitha feve, duke i burgosur, torturuar ose vrarë. Ky proces kulmoi më 13 nëntor 1967, kur Shqipëria u shpall zyrtarisht shteti i parë dhe i vetëm ateist në botë. Pasojat ishin tragjike, me mbylljen dhe shkatërrimin e kishave e xhamive deri në vitin 1971 dhe përfshirjen e ndalimit të fesë në Kushtetutën e vitit 1976. Ky moment mbetet një nga episodet më të errëta të historisë shqiptare, duke dëshmuar qasjen radikale të regjimit komunist ndaj besimit fetar./UBTNews/
