Qeveria kroate pret rritje reale të produktit të brendshëm bruto (PBB) prej tre për qind këtë vit, sipas Programit të Konvergjencës për periudhën 2023-2025, njoftoi sot kryeministri Andrei Plenkoviç në fjalimin e tij hyrës në seancën e qeverisë.
Sipas tij, rritja e PBB-së prej 3 për qind në vitin 2022 do të pasohet nga një rritje prej 4.4 për qind vitin e ardhshëm, pastaj 2.7 për qind në vitin 2024 dhe 2.5 për qind në vitin 2025, transmeton Seebiz.
Plenkoviq tha se deficiti buxhetor gjithashtu pritet të zvogëlohet gradualisht nga 2.8 për qind e PBB-së këtë vit në 1.6 për qind në dy vjetët e ardhshëm dhe në 1.2 për qind të PBB-së në vitin 2025.
Borxhi publik, sipas projeksioneve të programit të konvergjencës, duhet të bjerë nga 79.8 për qind e PBB-së e regjistruar në vitin 2021 në 76.2 për qind këtë vit dhe të vazhdojë të bjerë në 71.7 për qind në vitin 2023, më pas në 68.9 për qind në 2024 dhe 66.9 për qind në 2025.
Inflacioni në Kroaci vlerësohet nga qeveria në 7.8 për qind në vitin aktual, pas së cilës ajo parashikon norma dukshëm më të ulëta në vitet e ardhshme – 3.7 për qind në 2023 dhe 2.5 për qind në 2024.
Programi i Konvergjencës është një dokument i miratuar çdo vit si pjesë e Semestrit Evropian. Ai përcakton kuadrin dhe objektivat e politikës ekonomike, zhvillimet makroekonomike dhe fiskale dhe reformat kryesore strukturore për një periudhë afatmesme.