Me rastin e Pashkës Katolike, Papa Françesku mbajti të hënën një lutje të ndjekur nga disa mijëra adoleshentë, që shënoi dhe grumbullimin e parë të të rinjve në sheshin Shën Pjetër që nga rënia e pandemisë së COVID-19.
Ati i shenjtë mirëpriti besimtarët e rinj, por shprehu gjithashtu shqetësimin e tij për të ardhmen e tyre pas pandemisë globale dhe konfliktit mes Rusisë dhe Ukrainës.
“Për fat të keq, retë e zeza që po mbulojnë kohën tonë janë ende të dendura. Krahas pandemisë, Evropa po përjeton një luftë të tmerrshme. Ndërsa padrejtësitë dhe dhuna që shkatërrojnë njerëzimin dhe planetin vazhdojnë në shumë zona të botës, janë bashkëmoshatarët tuaj ata që paguajnë çmimin më të lartë. Jo vetëm ekzistenca e tyre komprometohet dhe bëhet më e pasigurt, por ëndrrat e tyre për të ardhmen shkatërrohen. Shumë vëllezër dhe motra vazhdojnë të presin për dritën e Pashkës”, tha Papa Françesku.
Të dielën, Papa kritikoi hapur Rusinë për tërheqjen e Ukrainës në një konflikt mizor dhe të pakuptimtë dhe u bëri thirrje liderëve të dy vendeve që të luftojnë për paqen, teksa e cilësoi festën katolike “Pashka e Luftës”.
Ati i shenjtë, 85 vjeç, bëri gjithashtu thirrje për pajtim mes izraelitëve dhe palestinezëve, si dhe popujve të Libanit, Sirisë, Irakut, Libisë, Mianmarit dhe Kongos, vend që do ta vizitojë korrikun e ardhshëm.