Numri i emigrantëve që mbërrijnë në Britani me varka të vogla shënoi një rekord për një ditë të vetme të hënën, pasi rritja e kalimeve të rrezikshme mbi Kanalin Anglez vazhdon pavarësisht planeve të qeverisë për të dëbuar ata që mbërrijnë ilegalisht në Ruandë.
Ministria e Mbrojtjes e Britanisë tha se një mijë e 295 persona në 27 varka u kapën pasi kaluan nga kontinenti evropian të hënën. Shifra tejkalon rekordin e mëparshëm ditor prej një mijë e 185 të vendosur nëntorin e kaluar.
Kryeministri në largim Boris Johnson kishte shpresuar se kërcënimi i dëbimit të njerëzve në Ruanda, i njoftuar në prill, së bashku me përpjekjet e tjera, të tilla si dorëzimi i përgjegjësisë së marinës për përgjimin e emigrantëve, do të vepronte si një pengesë për ata që mbërrinin me gomone dhe varka të vogla.
Sipas një marrëveshjeje të arritur në prill, Britania do të dërgojë dhjetëra mijëra emigrantë që mbërrijnë në brigjet e saj ilegalisht për më shumë se 4,000 milje (6,4000 km) në vendin e Afrikës Lindore.
Politika do të jetë objekt i një sfide ligjore në Gjykatën e Lartë të Londrës në fillim të shtatorit, kur një koalicion i grupeve të të drejtave të njeriut dhe një sindikatë do të argumentojnë se politika e Ruandës është e pazbatueshme dhe joetike.
Fluturimi i parë i planifikuar i dëbimit në qershor u bllokua nga një urdhër i minutës së fundit nga Gjykata Evropiane e të Drejtave të Njeriut.
“Rritja e kalimeve të rrezikshme të Kanalit është e papranueshme. Jo vetëm që ato janë një abuzim i hapur i ligjeve tona të imigracionit, por rrezikojnë jetën e njerëzve vulnerabël, të cilët po shfrytëzohen nga bandat e pamëshirshme kriminale“, tha një zëdhënës i qeverisë.
Në vitin 2021, 28,526 njerëz u zbuluan duke mbërritur me varka të vogla – me numrin më të madh nga Irani i ndjekur nga Iraku, Eritrea dhe Siria. Deri më tani këtë vit, më shumë se 22,000 emigrantë kanë ardhur në Britani, me zyrtarë qeveritarë që paralajmërojnë se 60,000 mund të mbërrijnë deri në fund të vitit.
Të dy kandidatët që konkurrojnë për të zëvendësuar Johnson si kryeministër, Liz Truss dhe Rishi Sunak, kanë premtuar se do të çojnë përpara planin e Ruandës.