Shoqëria civile në Shqipëri ka bërë thirrje për protestë të enjten në lidhje me vdekjen e 7-vjeçares në plazhin e Potamit në Himarë mesditën e së martës.
Protesta pritet të mbahet para Ministrisë së Brendshme ndërsa organizatorët kanë thënë se do të kërkojnë dorëheqjen e ministrit të Brendshëm, Bledi Çuçi, drejtorit të Përgjithshëm të Policisë së Shtetit, Gledis Nanos dhe ministres Mirela Kumbaro.
Thirrjes për protestë i është bashkuar edhe opozita.
7-vjeçarja u përplas për vdekje teksa ishte në breg, nga një skaf i cili drejtohej nga shtetasi Arjan Tase.
Ai ishte oficer policie dhe pas kësaj ngjarjeje, është përjashtuar nga detyra.
Dyshohet se Tase humbi kontrollin e mjetit lundrues dhe përplasi për vdekjen fëmijën në bregun e detit.