Ministri i Bujqësisë, Pylltarisë dhe Zhvillimit Rural, Faton Peci, gjatë ditës priti në takim Ambasadorin e Malajzisë, Dato Abdul Malik Melvin Castelin, me të cilin biseduan rreth bashkëpunimit mes dy vendeve në sektorin e bujqësisë.
“Me ambasadorin Castelin u dakorduam për konkretizim të bashkëpunimit në të ardhmen, përmes shkëmbimit të përvojave dhe ekspertizës së ndërsjellë, me qëllim të avancimit të politikave duke parë nga afër shembujt që ofron Malajzia në sektorin e bujqësisë”, ka thënë ministri Peci, thuhet në komunikatën e MBPZhR-së.
Në anën tjetër, Ambasadori jorezident i Malajzisë, z. Dato Abdul Malik Melvin Castelin, e falënderoi Ministrin për pritjen dhe njëkohësisht e ftoi Ministrin Peci për të marrë pjesë në Panairin e Produkteve Hallall “Mihas”.