Qendra Kombëtare e Fluturave në Teksas, e vendosur në brigjet e Rio Grande, kishte paraqitur një ankesë për të bllokuar ndërtimin e murit kufitar që u bë një element qendror i presidencës së Trump, duke thënë se kërcënonte habitatin e insekteve.
Kopshtet e kësaj qendreje janë shtëpia e më shumë se 200 llojeve të fluturave, gjithashtu ka dhe rrëqebujë, lloje të ujqërve, breshka dhe të tjera.
Por tani do të mbyllet deri në njoftimin e mëtejshëm sepse “siguria e stafit dhe vizitorëve tanë është shqetësimi ynë kryesor”, u tha në një deklaratë nga Jeffrey Glassberg, presidenti i Shoqatës së Fluturave të Amerikës së Veriut, i cili drejton organizatën.
Objekti tashmë u mbyll midis 28 dhe 30 janarit për shkak të “kërcënimeve të besueshme” në lidhje me një ngjarje të mbajtur nga mbështetësit e ish-presidentit në McAllen aty pranë, tha Glassberg.
Disa foto që pretendohej se ishin nga qendra kishin qarkulluar së bashku me mesazhe që akuzonin organizatën se ndihmonte kontrabandistët të sillnin emigrantë në Shtetet e Bashkuara.
“Ne nuk mendojmë se kërcënimi ka kaluar”, tha drejtoresha Marianna Trevino Wright, duke përmendur “provokimet” e përsëritura nga mbështetësit e Trump.
“Ne mezi presim të rihapet, së shpejti, kur autoritetet dhe profesionistët që po na ndihmojnë të kapërcejmë këtë situatë të na japin dritën jeshile”, tha Glassberg në deklaratë, duke vënë në dukje se punonjësit do të vazhdojnë të marrin pagat e tyre gjatë mbylljes./UBTNews/