Më shumë se 2.7 milionë dollarë janë ndarë për restaurimin e rajonit të sapoçliruar Kherson, shkroi kryeministri ukrainas Denys Shmyhal në një postim në Facebook të dielën.
“Qeveria ndau 100 milionë hryvnia (2,7 milionë dollarë) për restaurimin prioritar të rajonit të çliruar Kherson”, shkroi Shmyhal.
“Ky është fillimi i rindërtimit të rajonit. Fillimisht, ne po flasim për nevojat kritike të banorëve të rajonit: akses në dritë, ujë, ngrohje, komunikim dhe mjekësi”, vazhdoi ai. “Njerëzit do të marrin pensionet që u janë grumbulluar gjatë okupimit”.
Shmyhal shtjelloi gjithashtu mbështetjen financiare që Ukraina ka marrë nga partnerët e saj.
Kryeministri tha se këto burime do të drejtohen për sigurimet shoqërore dhe pagat e punonjësve të shtetit.
“Javën e ardhshme, Ukraina do të marrë gjithashtu 2.5 miliardë euro nga Bashkimi Evropian”, shtoi ai.
Shmyhal vuri në dukje gjithashtu se, mes sulmeve ruse ndaj sektorit energjetik të Ukrainës, qeveria e Kievit “po aktivizon importin e mjeteve për gjenerimin e energjisë”./UBTNews/