Superylli i Paris Saint-Germain, Kylian Mbappe këmbënguli të dielën se ai “asnjëherë nuk ka kërkuar të largohet” nga klubi në pronësi të Katarit në janar, pavarësisht raporteve se ai synonte të kërkonte një lëvizje sa më shpejt të jetë e mundur.
“Jam shumë i lumtur. Nuk kam kërkuar kurrë të largohem në janar”, tha ai pas fitores 1-0 të PSG ndaj Marseille, duke këmbëngulur se ai nuk ishte “i implikuar drejtpërdrejt apo tërthorazi” në thashethemet për të ardhmen e tij që u përhapën këtë javë.
Është hera e parë që superylli francez flet publikisht që kur raportet se ai dëshironte të largohej u shfaqën fillimisht në Spanjë përpara ndeshjes së së martës në Ligën e Kampionëve kundër Benfica-s.
Thashethemet u raportuan më vonë edhe nga media të ndryshme franceze.
“Nuk e kuptova pse kjo doli në ditën e një loje. Unë isha i tronditur si të gjithë”, pohoi Mbappe.
“Njerëzit mund të mendojnë se unë kam qenë i përfshirë, por nuk kam qenë fare”./UBTNews/