Kryeministri Anwar Ibrahim tha të hënën se Malajzia ishte e përgatitur për të negociuar mosmarrëveshjen e Detit të Kinës Jugore me Pekinin për të mbrojtur përpjekjet e vendit për eksplorimin e energjisë.
Kina pretendon sovranitetin mbi pothuajse të gjithë Detin e Kinës Jugore – një rrugë ujore strategjike përmes së cilës kalojnë triliona dollarë në tregti çdo vit – pavarësisht nga një vendim i gjykatës ndërkombëtare se pohimi i Pekinit nuk ka bazë ligjore.
Filipinet, Vietnami, Malajzia dhe Brunei kanë poashtu pretendime në det, ndërsa Shtetet e Bashkuara dërgojnë anije detare përmes tij për të mbrojtur lirinë e lundrimit në ujërat ndërkombëtare.
Anwar, i cili ishte në një vizitë në Pekin kohët e fundit, tha se çështja “e ndjeshme” u ngrit në një takim me presidentin kinez Xi Jinping pasi firma shtetërore energjetike e Malajzisë, Petronas, ka platformën e saj më të madhe të naftës në zonën e diskutueshme, si dhe disa projekte kërkimore.
“Unë thashë, si një vend i vogël ne kemi nevojë për burimet, (si) nafta dhe gazi, ne duhet të vazhdojmë (projektet e eksplorimit)”, tha Anwar.
“Por nëse kushti është që duhet të ketë negociata, atëherë ne jemi të gatshëm të negociojmë”.
Kryeministri nuk dha detaje të tjera mbi bisedën me Xi./UBTNews/