Modelja Linda Evangelista është shfaqur në kopertinën e revistës Vogue për herë të parë qëkur tha se ishte “deformuar” nga një procedurë estetike që sipas saj “shkoi keq”.
Në foto, shiriti dhe llastiku janë përdorur për të tërhequr fytyrën, nofullën dhe qafën e saj, duke fshehur problemet e shkaktuara nga një procedurë për shkrirjen e dhjamit. Ajo i tha revistës se po përpiqet ta pranojë veten ashtu siç është.
U bë një vit qëkur supermodelja kanadeze, një nga fytyrat më të bukura të pasarelave dhe kopertinave të revistave në vitet 1990 dhe 2000, u zhduk nga qendra e vëmendjes për shkak të ndërhyrjes kirurgjikale.
Të gjitha fotot e realizuara shfaqin vetëm pjesën e përparme të fytyrës, ndërsa qafa, veshët dhe flokët janë të mbuluara. Ajo tha se ishte tërhequr nga kjo procedurë pas reklamimit.
Ajo paditi Zeltiq Aesthetics, kompaninë që qëndron pas trajtimit, dhe tha në korrik se padia ishte zgjidhur./UBTNews/