Një gjykatë në Nepal lëshoi sot një urdhër arresti për kapitenin e ekipit kombëtar të kriketit, tha policia, pasi një vajzë 17-vjeçare e ka akuzuar atë për përdhunim.
Që nga viti 2018, Sandeep Lamichhane ka qenë lojtari më i kërkuar nepalez i kriketit në ligat ndërkombëtare T20.
Një vajzë 17-vjeçare, së bashku me një kujdestar, depozituan një ankesë kundër lojtarit në fillim të kësaj jave, duke pretenduar se ai e përdhunoi atë në një dhomë hoteli në Katmandu muajin e kaluar pasi u takuan dhe dolën jashtë.
“Gjykata e qarkut ka lëshuar një urdhër arresti kundër Sandeep Lamichhane për hetime të mëtejshme”, tha për AFP Dinesh Mainali, zëdhënës i policisë në Katmandu.
Policia tha të mërkurën se mund të kërkonte ndihmën e forcave të rendit jashtë shtetit, ose Interpolit, nëse ai nuk do të ishte në Nepal.
Prashant Bikram Malla, ushtrues detyre i sekretarit në Shoqatën e Kriketit të Nepalit, u tha gazetarëve se ai kishte folur me Lamichhane dhe gjithashtu informoi zyrtarët e ICC-së për rastin.
“Ai është lojtari ynë. Nëse ai ka kryer një krim, ne nuk do ta mbulojmë apo mbrojmë atë. Ky është qëndrimi i Shoqatës së Kriketit të Nepalit”, tha Malla./UBTNews/