Çmimi Nobel për Paqe iu dha aktivistit të burgosur të të drejtave të njeriut në Bjellorusi, Ales Bialiatski, grupit rus Memorial dhe organizatës ukrainase, Qendra për Liritë Civile.
Bialiatski, 60-vjeçar, ishte një nga udhëheqësit e lëvizjes demokratike në Bjellorusi në mesin e viteve 1980 dhe ka vazhduar të lobojë për të drejtat e njeriut dhe liritë civile në vendin autoritar. Ai themeloi organizatën joqeveritare, Qendra për të Drejtat e Njeriut Viasna, dhe fitoi çmimin Right Livelihood, në vitin 2020.
Aktivisti i të drejtave të njeriut u dënua me tre vjet burg në vitin 2011 nën akuzat për evazion fiskal – akuza të cilat ai i mohon. Ai u arrestua sërish në vitin 2020 pas protestave antiqeveritare të atij viti dhe u burgos pa proces gjyqësor.
Grupi rus Memorial
Memoriali u themelua në Bashkimin Sovjetik në vitin 1987 për të siguruar që viktimat e represionit komunist të kujtoheshin dhe fillimisht u drejtua nga shkencëtari i famshëm disident sovjetik, Andrei Sakharov. Për më shumë se 30 vjet, grupi dëshmoi abuzimet e të drejtave të njeriut në vend nga duart e qeverisë.
Ky grup ka vazhduar të mbledhë informacione mbi abuzimet e të drejtave të njeriut në Rusi dhe ka gjurmuar fatin e të burgosurve politikë në vend.
Qendra e Ukrainës për Liritë Civile
Grupi u themelua në vitin 2007 për të promovuar të drejtat e njeriut dhe demokracinë në Ukrainë gjatë një periudhe trazirash në vend. Pas pushtimit rus të Ukrainës në shkurt, grupi ka punuar për të dokumentuar krimet ruse të luftës kundër civilëve ukrainas./UBTNews/