Edon Zhegrova, sulmuesi i përfaqësueses së Kosovës që luan për Lille në Ligue 1, është bërë objekt i interesit të dy prej klubeve më të mëdha italiane, Juventus dhe Roma. Këto dy ekipe prestigjioze po përpiqen të sigurojnë shërbimet e tij në merkaton e ardhshme, duke e kthyer këtë transferim potencial në një nga garat më të nxehta të merkatos së janarit.
Sipas mediave italiane, të dy klubet po planifikojnë një qasje të fuqishme për të sjellë Zhegrovën në Serie A. Edhe pse Roma po konsideron seriozisht ofertën për 25-vjeçarin, duket se Juventus ka një avantazh të lehtë në këtë garë. Ky avantazh lidhet kryesisht me marrëdhëniet e mira të klubit torinez me agjentin e sulmuesit, Hasn Cetinkaya, i cili më parë ka negociuar me sukses shitjen e mesfushorit Denis Zakaria nga Juventusi te Monaco për 20 milionë euro.
Juventus po e sheh Zhegrovën si një lojtar që mund të sjellë freski dhe kreativitet në sulm, ndërkohë që Roma po synon të forcojë skuadrën e saj për të përballuar më mirë garat e brendshme dhe ato ndërkombëtare. Si pjesë e kësaj gare, kryeqytetasit kanë ndërmend të vijojnë bisedimet për afrimin e sulmuesit shqiptar nga Kosova, duke u përballur me konkurrencën e fortë të “Zonjës së Vjetër”.
Në anën tjetër, mediat italiane raportojnë se Claudio Ranieri, trajneri i Romës, është nisur për Londër për të takuar presidentin e Romës, Dan Friedkin, për të diskutuar strategjinë e ardhshme të merkatos, ku Zhegrova mbetet një ndër synimet kryesore.
Ndërsa bisedimet do të intensifikohen në javët në vazhdim, mbetet për t’u parë se cili klub do të fitojë zemrën dhe nënshkrimin e Zhegrovës, që po bëhet një nga lojtarët më të kërkuar të momentit në futbollin europian../UBTNews/