Qeveria e Kosovës ka mbajtur sot një mbledhje solemne në nderim të 28-vjetorit të Epopesë së Ushtrisë Çlirimtare të Kosovës. Kryeministri Albin Kurti, gjatë fjalës së tij para kabinetit qeveritar, e ka cilësuar këtë ngjarje si pikën më tronditëse dhe vendimtare të historisë sonë bashkëkohore, e cila ndryshoi përgjithmonë vetëdijen kombëtare.
Duke reflektuar mbi rezistencën e pamohueshme në Prekaz, Kurti vuri në dukje se historia evropiane nuk njeh një rast të ngjashëm. “Në analet e historisë së Evropës nuk mund të gjendet një rast i vetëm kur për tre ditë e tre net rresht i bën rezistencë një familje liridashëse autoktone, një shteti policor e okupator”, deklaroi ai, duke kujtuar përballjen e pabarabartë të familjes Jashari me makinerinë e rëndë ushtarake serbe.
Sipas kryeministrit, forca e kësaj ngjarjeje qëndron te vendimi kolektiv i familjes për të sakrifikuar gjithçka. Ai theksoi se liria e sotme nuk është rastësi, por fryt i një qëndrese të vetëdijshme. “Ata qëndruan tok së bashku nga bindja se liria kërkon sakrificë, e cila nis nga vetja”, u shpreh Kurti, duke shtuar se kullat e Jasharëve u shndërruan në simbol të unitetit shqiptar.
Në mbyllje të fjalës së tij, kreu i ekzekutivit bëri thirrje që kjo trashëgimi të mos mbetet vetëm në kujtesë, por të shërbejë si udhërrëfyes për të ardhmen e shtetit.
“Liria që gëzojmë sot është ndërtuar mbi qëndresën e atyre që nuk u tërhoqën dhe nuk njohin dorëzim”, tha ai, duke premtuar se Qeveria do të punojë që ky thesar kombëtar të dokumentohet dhe t’u përcillet brezave të rinj si frymëzim për forcimin e sovranitetit të Republikës.