Japonia mahniti katër herë kampionët e botës, Gjermaninë, në një ndeshje të Grupit E më 23 nëntor, në atë që ishte padyshim përmbysja e dytë më e madhe e Kupës së Botës 2022 të Katarit.
Në pjesën e dytë, Japonia shënoi dy gola, duke siguruar një fitore historike. Megjithatë, jo vetëm lojtarët janë lavdëruar për punë e tyre në fushë. Tifozët japonezë kanë fituar lavdërime nga e gjithë bota pas gjestit të tyre pas turneut.
Një grup mbështetësish të vendit aziatik që u mblodhën në stadiumin Khalifa International në Doha për të parë ndeshjen, qëndruan prapa edhe pas fishkëllimës së fundit për të pastruar plehrat në tribuna.
Në një video të shpërndarë së fundmi në Twitter, fansat me kapele japoneze mund të shihen duke marrë shishe uji dhe pako ushqimore të lëna nga turma dhe duke i depozituar ato në thasë plehrash.
Kjo nuk është hera e parë që tifozët japonezë tregojnë dashamirësi pas një loje.
Pas humbjes hapëse të Katarit ndaj Ekuadorit në Doha më 23 nëntor, tifozët japonezë në stadiumin Al Bayt u bënë tituj lajmesh pasi grumbulluan thasë me mbeturina.
Omar Farooq, një influencer me miliona abonentë, mbeti pa fjalë pasi ishte dëshmitar këtij akti, të cilin ai e dokumentoi për ndjekësit e tij në Instagram. “Dikush të më bindë se kjo është normale”, tha ai.
“Ne jemi japonezë dhe nuk lëmë mbeturina pas nesh dhe e respektojmë vendin”, i tha një tifoz atij, i cili gjithashtu u bashkua më pas për të ndihmuar japonezët./UBTNews/