Kryetari i Partisë Demokratike të Kosovës, Memli Krasniqi, ka kritikuar Qeverinë Kurti për mungesë të vëmendjes ndaj bujqve, e cila deri tani nuk e ka analizuar situatën siç duhet por vetëm ka improvizuar, pa pasur planifikim afatmesëm.
Krasniqi bashkë me kryetarin e Komunës së Vushtrrisë, Ferit Idrizi, ka vizituar sot Organizatën “Iniciativa për Zhvillimin e Bujqësisë së Kosovës” ku kanë bashkëbiseduar me fermerë të kësaj komune për sfidat e tyre dhe mungesën e mbështetjes nga Qeveria e Kosovës.
Gjatë kësaj vizite, lideri i PDK-së u shpreh se kjo organizatë ndër vite ka dhënë një kontribut të matshëm në avancimin e sektorit të bujqësisë, në mënyrë të veçantë në aftësimin profesional të kuadrove të reja.
“Është e jashtëzakonshme që kemi tashmë organizata joqeveritare si IADK që u mundëson një numri të madh të të interesuarve që të aftësohen dhe trajnohen profesionalisht në fusha të ndryshme në përpunimin e pemëve, perimeve, qumështit”, tha Krasniqi.
Ai tregoi se gjatë takimit u diskutua për vështirësitë me të cilat përballen fermerët e Vushtrrisë.
“U ndjeva vërtetë i shqetësuar nga vështirësitë, sfidat që i kanë fermerët, e të cilat nuk po adresohen nga ana e Qeverisë e që është obligim i tyre, meqenëse sidomos gjatë periudhës së pandemisë por edhe në vitin e fundit, kryesisht edhe për shkak të ndikimit të luftës në Ukrainë, shumë produkte dhe inpute bujqësore janë shtrenjtuar dukshëm. Ka telashe me plasimin e produkteve në treg, është rritur një pasiguri e madhe sa i përket këtij sektori dhe Qeveria duket se po vazhdon ta neglizhojë situatën, përkundër premtimeve pompoze që do t’i rrisin subvencionet”, tha ai.
Krasniqi u shpreh tejet mirënjohës për punën e IADK-së premtoi se PDK si lidere e opozitës do të vazhdojë të angazhohet për të qenë zë i interesave të bujqve.
Ndërkaq, kryetari i Komunës së Vushtrrisë, Ferit Idrizi, tha se është i përkushtuar për t’i ndihmuar fermerët e kësaj komune që janë punëtorë të pandalshëm.
Idrizi bëri të ditur se ka marrë vendim që të subvencionojë të gjithë fermerët e Vushtrrisë me 4 centë për litër qumështi.
Krahas kësaj, ai tha se po i subvencionojnë me pagesa direkte edhe fermerët tjerë dhe blegtorët.
Ndërsa, Zenel Bunjaku, drejtor i Organizatës Iniciativa për zhvillimin e bujqësisë së Kosovës, tha se deri tani janë marrë parasysh të gjitha propozimet dhe iniciativat e Organizatës IADK-së në Vushtrri.