Kryetari i Partisë Demokratike të Kosovës Memli Krasniqi, ka thënë se aq beson në punën e kriptovalutave saqë edhe kursimet e fëmijëve të tij i ka investuar në kriptovaluta.
Krasniqi tha në emisionin Rubikon në Klan Kosova se investimet i kishte filluar në vitin 2016-të dhe se është penduar se pse nuk i ka filluar investimet më herët.
Ai tha se nuk ia rekomandon askujt që të bëj investime në kriptovaluta pasi që ka raste kur edhe mund të dështojnë dhe t’i humbin të gjitha.
“Nuk i rekomandoj askujt me bo, çka kam bërë unë. Unë kam pas sukses por kam mundur edhe të dështoj shumë. Aq besoj në këtë punë sa edhe kursimet e fëmijëve të mi, para dy vitesh i kamë kthyer në kriptovaluta”.
“Ka kriptovaluta që ka rritje kur tjerat kanë rënie, ose e kundërta. Po, unë kam besim që kjo është e ardhmja. Unë nuk i rekomandoj askujt asgjë, krejt çka po flas për kripto nuk është rekomandim financiar, nuk është këshillë financiare”.
I pari i PDK-së në Agjencinë kundër Korrupsion në formularin e deklarimit të pasurisë ka deklaruar se vlera e investimeve është rreth 300 mijë euro.