Kryetari i Kuvendit të Kosovës, Glauk Konjufca, sot është pritur në takim nga kryetari i Parlamentit të Austrisë, Wolfgang Sobotka.
Gjatë takimit shumë miqësor, kryeparlamentari Sobotka, ka konfirmuar gatishmërinë e Austrisë, në veçanti të Parlamentit austriak, për vazhdimin e mbështetjes së Kosovës dhe thellimin e marrëdhënieve dypalëshe.
Kryetari Konjufca kërkoi mbështetjen e Austrisë për Kosovën në proceset e integrimit euroatlantik dhe të anëtarësimit në organizatat ndërkombëtare.
Bashkëbiseduesit rikonfirmuan avancimin e bashkëpunimit, shkëmbimin e përvojave parlamentare dhe fuqizimin e mëtejmë të miqësisë mes dy shteteve tona.
Në takim u shkëmbyen mendime edhe në lidhje me agresionin rus në Ukrainë dhe domosdoshmërinë e sanksionimit të Rusisë.
Kryetari Konjufca po qëndron për vizitë zyrtare në Austri. Gjatë qëndrimit atje, ai do të takohet edhe me zyrtarë të tjetër shtetërorë e institucionalë të këtij shteti.
Konjufca është paraparë që të mbajë ligjëratë në Institutin për Paqe në Vjenë, të zhvillojë një takim me historianin Oliver Schmidt, Shoqatën e Miqësisë Austri-Kosovë, kryetarin e saj dhe njëkohësisht eurodeputetin austriak, Lukas Mandl, si dhe të takojë bashkatdhetarët që jetojnë e veprojnë në Austri.