Klubet e futbollit në Kosovë janë futur në një situatë të pa qartë sa i përket gjendjes së tyre financiare për shkak të mos licencimit të Federatës së Futbollit të Kosovës dhe si pasojë edhe mos mundësimit të shfrytëzimit të Ligjit të Sponsorizimit.
Tash e disa javë drejtuesit e klubeve të Superligës së Kosovës kanë shfaqur hapur shqetësimin e tyre në lidhje me situtën financiare brenda klubeve të tyre duke kërkuar reagimin e Ministrisë së Sportit në këtë çështje.
Në këtë drejtim, drejtuesit e rreth 30 klubeve pritet të takohen sot gjatë ditës në selinë e FFK-së për të diskutuar për hapat e mëtutjeshëm.
Bojkotimi i garave është njëri nga opsionet që ‘mund të shtrohet në diskutim, nëse nuk shihet një zgjidhje e kësaj situate në horizont.
Kujtojmë se FFK është njëra nga federata që edhe më tutje nuk është licencuar, edhe pse Ministri i Sportit Hajrulla Çeku ditë më parë deklaroi se problemi i licencimit tashmë nuk është te federata, por tek disa klube që edhe më tutje nuk i kanë plotësuar të gjitha dokumentet për licencim.