Dy gazetarë britaniko-iranianë për kanalin televiziv Iran International në gjuhën persiane me bazë në Mbretërinë e Bashkuar, janë kërcënuar me jetë, ka konfirmuar një burim i zbatimit të ligjit në Mbretërinë e Bashkuar.
Kompania mëmë Volant Media tha se policia metropolitane i ka njoftuar ata për rritje të kërcënimeve nga forcat iraniane të sigurisë. Kompania denoncoi “përshkallëzimin e një fushate të sponsorizuar nga shteti për të frikësuar gazetarët iranianë që punojnë jashtë vendit”.
Autoritetet iraniane nuk e kanë komentuar rastin. Megjithatë, muajin e kaluar autoritetet njoftuan sanksione kundër Iran International dhe BBC News Persian, duke i akuzuar për “nxitje të trazirave” dhe “mbështetje të terrorizmit” lidhur me mbulimin e protestave antiqeveritare që kanë përfshirë vendin gjatë dy muajve të fundit.
Dy kanalet me bazë në Mbretërinë e Bashkuar janë ndaluar tashmë nga Irani, por një mbikëqyrës i lirisë së shtypit thotë se ato janë ndër burimet kryesore të lajmeve dhe informacionit në një vend ku mediat e pavarura dhe gazetarët persekutohen vazhdimisht./UBTNews/