Ushtria japoneze njoftoi sot zbulimin e katër anijeve të mëdha luftarake amfibe ruse, që lundronin pranë ishujve të saj, ndërsa udhëtonin drejt perëndimit, ndoshta drejt Evropës.
Fotot e transportit amfib, të përdorura zakonisht për zbarkimin e trupave, të publikuara nga Ministria japoneze e Mbrojtjes, treguan atë që dukej të ishin kamionë ushtarakë, të ngarkuar në kuvertën e njërës prej tyre.
Kur u pyet nëse këto anije mund të niseshin drejt Ukrainës, një zëdhënës i ministrisë tha se “ne nuk e dimë se ku po shkojnë, por drejtimi i tyre sugjeron se është e mundur”.
Një patrullë detare e Forcave Vetëmbrojtëse Japoneze zbuloi fillimisht anijet ruse, që mund të mbajnë dhjetëra tanke, automjete të tjera ushtarake dhe qindra trupa, dhe i monitoroi ato ndërsa kalonin në perëndim nga oqeani Paqësor në Detin e Japonisë përmes ngushticës së Tsurugas.
Kjo ngushticë ndan ishullin Honshu nga ishulli Hokkaido.
Në të njëjtën kohë, zëdhënësi tha se është e pazakontë që anijet ruse të kalojnë përmes ngushticës, për më tepër kaq pranë territorit japonez.