Një japonez rreth të 70-ave është dërguar në spitalin e Tokios pasi i vuri flakën vetes pranë zyrës së kryeministrit, sipas transmetuesit publik japonez NHK.
“Kam dëgjuar se policia gjeti një burrë që kishte pësuar djegie pranë zyrës së kabinetit këtë mëngjes para orës 7 të mëngjesit dhe jam i vetëdijshëm se policia po heton”, u tha gazetarëve të mërkurën shefi i kabinetit japonez Hirokazu Matsuno.
Burri i tha policisë se ishte kundër planeve për të mbajtur një funeral shtetëror për ish-kryeministrin Shinzo Abe më vonë këtë muaj, raportoi TV Asahi, degë e CNN.
Policia tani po mbledhë prova nga kamerat e sigurisë dhe dëshmitarët okularë, tha TV Asahi, duke shtuar se një oficer që u përpoq të shuante zjarrin ishte plagosur poashtu dhe u dërgua në spital.
Shinzo Abe ishte kryeministri më jetëgjatë i Japonisë, duke mbajtur postin nga 2006 në 2007 dhe përsëri nga 2012 në 2020 përpara se të jepte dorëheqjen për arsye shëndetësore.
Ai vdiq nga gjakderdhja e tepërt në korrik në moshën 67-vjeçare, pasi u qëllua duke mbajtur një fjalim në fushatën publike.
Lajmi për vrasjen e tij bëri jehonë në të gjithë botën dhe turma të mëdha u mblodhën në rrugët e Tokios për ta nderuar.
Qeveria japoneze ka njoftuar se do të mbajë një funeral shtetëror për Abe më 27 shtator, me ceremoninë që parashikohet të kushtojë deri në 12 milionë dollarë për shkak të tarifave të larta të sigurisë dhe procesit për të pritur personalitete të huaja.
Kundërshtimi ndaj kësaj lëvizjeje po rritet. Disa protestues janë të pakënaqur me atë që ata e shohin si një përdorim të tepruar të fondeve publike për ngjarjen, ndërsa të tjerë tregojnë për politikën herë pas here përçarëse të Abe.
Funeralet shtetërore në Japoni zakonisht rezervohen për anëtarët e familjes perandorake, megjithëse nderi iu dha edhe ish-kryeministrit Shigeru Yoshida në vitin 1967.
Pavarësisht fitoreve të tij në kutinë e votimit, Abe nuk ishte i panjohur për polemika. Ai u përfshi në disa skandale gjatë karrierës së tij dhe ngjalli polemika me vizitat në faltoren Yasukuni, që përfshin emrat e kriminelëve të dënuar të luftës dhe konsiderohet nga Kina, Koreja e Veriut dhe Koreja e Jugut si një simbol i së kaluarës ushtarake perandorake të Japonisë./UBTNews/