Lideri suprem i Iranit, Ajatollah Ali Khamenei, tha më 4 qershor se Teherani nuk do të heqë dorë nga pasurimi i uraniumit, duke refuzuar një kërkesë kyç të Shteteve të Bashkuara që synon zgjidhjen e mosmarrëveshjeve të kamotshme bërthamore.
Ai tha se ndalimi i pasurimit të uraniumit është kundër interesave të Iranit.
Propozimi i SHBA-së për një marrëveshje të re bërthamore iu prezantua Iranit të shtunën nga Omani, që ndërmjetëson bisedimet mes ministrit të Jashtëm iranian, Abbas Araqchi, dhe të dërguarit amerikan për Lindjen e Mesme, Steve Witkoff.
Pas pesë runde bisedimesh, disa çështje kyç mbeten të pazgjidhura, përfshirë insistimin e Iranit për të vazhduar pasurimin e uraniumit dhe refuzimin e Teheranit për të larguar stoqet ekzistuese me uranium të pasuruar në nivel të lartë, që është lëndë e mundshme për prodhimin e bombave bërthamore.
“Pasurimi i uraniumit është kyç në programin tonë bërthamor dhe armiqtë tanë janë përqendruar në pasurim”, tha Khamenei gjatë një fjalimi televiziv. Propozimi i SHBA-së “bie ndesh me besimin e shtetit tonë në vetëmjaftueshmëri dhe në parimin ‘ne mundemi’”, tha ai.
“Udhëheqësit e pasjellshëm dhe arrogantë të Amerikës vazhdimisht kërkojnë që ne nuk duhet të kemi një program bërthamor. Kush janë ata që të vendosin nëse Irani duhet të ketë pasurim”, shtoi ai.
Teherani tha se dëshiron të perfeksionojë teknologjinë bërthamore për qëllime paqësore dhe prej kohësh ka mohuar akuzat e fuqive perëndimore se po synon të zhvillojë armë bërthamore.
Presidenti amerikan, Donald Trump, ka rinisur fushatën e tij të “presionit maksimal” ndaj Teheranit që kur është rikthyer në Shtëpinë e Bardhë në janar. Kjo fushatë përfshin sanksione, por edhe kërcënime për ta bombarduar Iranin, nëse bisedimet nuk prodhojnë një marrëveshje.
Gjatë mandatit të parë më 2018, Trump u largua nga marrëveshja bërthamore që Teherani arriti më 2015 me gjashtë fuqi bërthamore. SHBA-ja rivendosi sanksionet e ashpra që kanë dëmtuar ekonominë e Iranit. Ndërkaq, Teherani u kundërpërgjigj me pasurimin e uraniumit përtej kufijve të përcaktuar në marrëveshjen bërthamore./REL/