Mbikëqyrësi bërthamor i OKB-së tha të mërkurën se nuk mund të garantonte natyrën paqësore të programit bërthamor të Iranit, duke thënë se nuk kishte “asnjë përparim” në zgjidhjen e çështjeve lidhur me praninë e materialit bërthamor në vendet e padeklaruara.
Në një raport të parë nga AFP, Agjencia Ndërkombëtare e Energjisë Atomike (IAEA) tha se“nuk ishte në gjendje të ofronte siguri se programi bërthamor i Iranit është ekskluzivisht paqësor”.
Raporti thotë se Drejtori i Përgjithshëm i IAEA, Rafael Grossi, ishte “gjithnjë e më i shqetësuar se Irani nuk është angazhuar me Agjencinë për çështjet e mbetura gjatë kësaj periudhe raportuese dhe, për rrjedhojë, se nuk ka pasur përparim drejt zgjidhjes së tyre”.
IAEA i ka bërë presion Iranit për përgjigje për praninë e materialit bërthamor në tre vende të padeklaruara.
Teherani, i cili pohon se programi i tij bërthamor është ekskluzivisht paqësor, po këmbëngul që hetimi i IAEA-s të përfundojë – në mënyrë që të ringjallë marrëveshjen e vitit 2015 për programin e tij bërthamor me fuqitë botërore.
Në një raport të veçantë të lëshuar poashtu të mërkurën, IAEA tha se Irani po vazhdonte pasurimin e uraniumit mbi kufijtë e përcaktuar në marrëveshjen e dështuar të vitit 2015, me stokun e tij tani mbi 19 herë më shumë se kufiri i përcaktuar në marrëveshje.
Raporti tha se stoku i Iranit që nga 21 gushti ishte rreth 3,940 kilogramë, 131.6 kilogramë më shumë nga raporti i fundit tremujor./UBTNews/