Aleanca për Ardhmërinë e Kosovës (AAK) ka kërkuar rinumërim të votave në prani të hetuesisë dhe Policisë së Kosovës që të zbardhet e vërteta, pas dyshimeve se ka pasur manipulim me vota.
I pari i AAK-së, Ramush Haradinaj ka kërkuar nga hetuesia që të zbardhet rasti i keqpërdorimit me vota, andaj kërkojnë rinumërim të tyre.
“Edhe ne jemi të shqetësuar me keqpërdorimet që kanë ndodhur në disa raste nga komisionerë dhe vëzhgues të pandërgjegjshëm, dhe kërkojmë që kriminelët e votës të përfundojnë në burg. Për këtë arsye kërkojmë rinumërim të plotë të votave në prezencë të hetuesisë dhe policisë që të gjendet e vërteta. Ndërtimi i institucioneve duhet të ndodh sa më shpejt, ne nuk kontestojmë rezultatin zgjedhor, përqindjen tonë ose të LVV-së, LDK-së apo PDK-së apo partive tjera, dhe nuk shoh pse dikush duhet të dalë kundër rinumërimit përpos nëse fshehin keqpërdorime tjera për të cilat nuk di opinioni”, tha Haradinaj./UBTNews