Finlanda dhe Suedia do të dërgojnë delegacione në Ankara të mërkurën në përpjekje për të zgjidhur kundërshtimin turk ndaj aplikimeve të tyre për anëtarësim në aleancën ushtarake të NATO-s, tha të martën ministri i jashtëm finlandez Pekka Haavisto.
“Ne po dërgojmë delegacionet tona bashkë me Suedinë për vizitë zyrtare në Ankara Ankaranë. Kjo do të ndodhë nesër, kështu që dialogu po vazhdon”, tha Haavisto gjatë një diskutimi në panel në Forumin Ekonomik Botëror në Davos.
Presidenti turk Rexhep Tajip Erdogan, i cili ka kundërshtuar anëtarësimin e Suedisë dhe Finlandës në NATO, zhvilloi telefonata me liderët e dy vendeve nordike të shtunën dhe diskutoi shqetësimet e tij.
Turqia thotë se Suedia dhe Finlanda strehojnë njerëz të lidhur me grupin terrorist PKK dhe ndjekës të Fethullah Gylenit, të cilin Ankaraja e akuzon për orkestrimin e një përpjekjeje për grusht shteti në vitin 2016.
“Ne e kuptojmë se Turqia ka disa nga shqetësimet e veta të sigurisë ndaj terrorizmit por ne mendojmë se këto çështje mund të zgjidhen. Mund të ketë edhe disa çështje që nuk lidhen drejtpërdrejt me Finlandën dhe Suedinë, por më shumë me anëtarët e tjerë të NATO-s”, tha Haavisto.
Sipas presidencës turke, Erdogan, i tha kryeministres suedeze Magdalena Andersson të shtunën se Ankaraja priste hapa konkretë për të adresuar shqetësimet e saj. Ai tha gjithashtu se një embargo e eksportit të armëve, e vendosur ndaj Turqisë në vitin 2019, duhet të hiqet.
Presidenti finlandez Sauli Niinisto tha të shtunën se kishte zhvilluar bisedime të hapura dhe të drejtpërdrejta në telefon me Erdoganin.
“Unë deklarova se si aleatë të NATO-s, Finlanda dhe Turqia do të angazhohen për sigurinë e njëra-tjetrës dhe marrëdhënia jonë do të forcohet kështu”, shkroi Niinisto në Twitter pas telefonatës.
Erdogan foli gjithashtu me shefin e NATO-s, Jens Stoltenberg, të shtunën, duke i thënë se Ankaraja nuk do të shikojë pozitivisht ofertat e Suedisë dhe Finlandës për NATO-n, nëse nuk tregojnë qartë bashkëpunimin në luftën kundër terrorizmit dhe çështjeve të tjera. /UBTNews/