Policia gjermane regjistroi një rritje të ndjeshme të përshkrimeve të abuzimit seksual ndaj fëmijëve vitin e kaluar krahasuar me një vit më parë, tha të hënën zyrtari më i lartë i policisë kriminale të vendit.
Më shumë se 39 mijë raste ose një rritje prej 108.8%, erdhën në vëmendjen e autoriteteve vitin e kaluar, sipas një analize të posaçme të statistikave të krimit të policisë, të paraqitura para gazetarëve në Berlin. Këto raste përfshijnë shpërndarjen, përvetësimin, posedimin dhe prodhimin e përshkrimeve të dhunës seksuale ndaj fëmijëve dhe adoleshentëve.
Sipas raportit, rastet e njohura të abuzimit seksual të fëmijëve u rritën me 6,3% , vitin e kaluar në më shumë se 15 mijë e 500. Shifrat vjetore mbulojnë vetëm pjesën e rasteve për të cilat policia është në dijeni, shifrat reale pritet të jenë shumë më të larta, tha Holger Muench, kreu i Zyrës Federale të Policisë Kriminale të Gjermanisë.
Autoritetet vlerësojnë se një deri në dy nxënës për klasë shkolle në Gjermani preken nga dhuna seksuale.
Muench tha gjithashtu se më shumë njerëz po raportojnë dyshime për abuzim me fëmijët sesa në të kaluarën. /UBTNews/