Giovanni Malagò është zgjedhur presidenti i ri i Federata Italiane e Futbollit (FIGC), duke marrë drejtimin e futbollit italian në një moment delikat pas dështimit të kombëtares për t’u kualifikuar në Kupën e Botës 2026.
Malagò, i cili konsiderohej një nga kandidatët favoritë për këtë post, mori mbështetjen e disa prej institucioneve më të rëndësishme të futbollit italian dhe tashmë do të udhëheqë procesin e reformimit të sportit më popullor në vend.
Ish-presidenti i Komiteti Olimpik Kombëtar Italian (CONI) pason Gabriele Gravina, i cili dha dorëheqje në prill pas eliminimit të Italisë nga gara për një vend në Botërorin 2026. Largimi i Gravinës erdhi në një klimë të tensionuar, mes kritikave të shumta nga opinioni publik dhe komuniteti i futbollit, pas një tjetër dështimi të rëndë të “Azzurrëve” në arenën ndërkombëtare.
Në programin e tij, Malagò ka premtuar reforma të thella që synojnë modernizimin dhe ringritjen e futbollit italian. Prioritetet e tij përfshijnë zhvillimin e talenteve të rinj, investimet në infrastrukturë dhe stadiume moderne, forcimin e stabilitetit financiar të klubeve, si dhe përmirësimin e organizimit dhe menaxhimit të futbollit në të gjitha nivelet.
Zgjedhja e Malagòs shihet nga shumë analistë si fillimi i një kapitulli të ri për FIGC-në, me synimin për ta rikthyer Italinë në elitën e futbollit botëror dhe për të ndërtuar një projekt afatgjatë që do t’i japë fund periudhës së vështirë që ka përjetuar kombëtarja vitet e fundit.
D.L