Dion Gallapeni ishte një prej protagonistëve të fitores së Kosovës ndaj Irlandës, në përballjen e parë historike mes dy Kombëtareve në nivelin senior.
“Dardanët” triumfuan me rezultat 1-0 në stadiumin “Fadil Vokrri” në Prishtinë, falë golit të Vedat Muriqit në pjesën e dytë, duke siguruar tri pikë të rëndësishme.
Në një ndeshje ku reparti defensiv kishte përgjegjësi të madhe, Gallapeni zhvilloi një paraqitje të sigurt dhe të kompletuar, duke qenë ndër lojtarët më të spikatur të Kosovës.
Mbrojtësi ishte i pagabueshëm në duele, duke fituar 100 për qind të dueleve tokësore, 5 nga 5, si dhe të gjitha duelet ajrore, 4 nga 4.
Ai ishte po ashtu perfekt në ndërhyrje, duke fituar të dyja ndërhyrjet e tij, ndërsa kontribuoi në neutralizimin e aksioneve të rrezikshme të irlandezëve.
Gallapeni pati gjithsej 81 prekje të topit, regjistroi tetë rikuperime dhe shtatë spastrime, ndërsa fitoi edhe tri faulle.
Kontributi i tij nuk mungoi as në fazën ofensive. Ai realizoi tri krosime të sakta, pati dy ndërprerje të aksioneve dhe krijoi një mundësi për bashkëlojtarët.
Me siguri në prapavijë, efikasitet në duele dhe kontribut në të dyja fazat e lojës, Gallapeni ishte një prej figurave kryesore në fitoren historike të Kosovës ndaj Irlandës.
D.L