FIFA ka anuluar ndarjen e biletave të dedikuara për tifozët e Iranit për tri ndeshjet e përfaqësueses iraniane në Kupën e Botës, të cilat zhvillohen në Shtetet e Bashkuara të Amerikës. Lajmi është bërë i ditur nga Federata e Futbollit të Iranit të martën.
Sipas rregullores së FIFA-s, çdo federatë e 48 përfaqësueseve pjesëmarrëse ka të drejtë të marrë dhe të shpërndajë rreth 8 për qind të kapacitetit të stadiumit për tifozët e saj. Megjithatë, vetëm pak ditë para ndeshjes hapëse të Iranit më 15 qershor në Los Angeles ndaj Zelandës së Re, federata iraniane ka deklaruar se nuk është më në gjendje të sigurojë bileta për mbështetësit e saj.
Ky zhvillim vjen në një moment kur marrëdhëniet mes Federatës Iraniane të Futbollit, FIFA-s dhe autoriteteve amerikane raportohet të jenë të tensionuara.
Ndërkohë, përfaqësuesja e Iranit është vendosur në qytetin kufitar të Meksikës, Tijuana, në vend të Arizonës, ku fillimisht ishte planifikuar kampi stërvitor i ekipit.
Sipas raportimeve, disa zyrtarë të federatës iraniane ende nuk kanë arritur të sigurojnë leje hyrjeje në Shtetet e Bashkuara të Amerikës, çka ka shtuar më tej pasigurinë rreth organizimit dhe pjesëmarrjes së tyre në turne.
D.L