Berat Gjimshiti ka shprehur zhgënjimin e tij pas eliminimit të Atalantës nga Liga e Kampioneve, ku ekipi italian u mund 3-1 në shtëpi nga Club Brugge. Ky rezultat e la Atalantën jashtë kompeticionit, duke shuar ëndrrat për një edicion të suksesshëm në Ligën e Kampioneve.
Gjimshiti, mbrojtësi shqiptar, e pranoi se humbja ishte një zhgënjim i madh për të dhe ekipin. Pas ndeshjes, ai tha: “Është e vështirë të gjesh fjalët, komplimente atyre. Në pjesën e parë, ata shënuan tre gola në kundërsulm. Duke shënuar kaq shpejt, ata e komplikuan shumë ndeshjen tonë.”
Ai theksoi se më e rëndësishmja ishte shpirti luftarak i skuadrës, e cila, megjithatë, nuk u dorëzua. “Nuk u dorëzuam, tani duhet të rinisemi dhe të mendojmë për kampionatin”, shtoi Gjimshiti.
Mbrojtësi shqiptar komentoi gjithashtu mbi performancën e Club Brugge, duke e cilësuar skuadrën e tyre si shumë të fortë dhe të organizuar. “Ata kanë një skuadër të mirë, luajnë mirë futboll dhe na vunë në vështirësi. Në ndeshjen e parë ata ishin më të vështirë për t’u përballuar, ndërsa në ndeshjen e dytë ishin vdekjeprurës,” tha Gjimshiti.
I pyetur për situatën në pjesën e parë, kur Atalanta humbi 0-3, ai theksoi se kjo ishte një goditje e madhe për skuadrën. “Në një ndeshje kaq të rëndësishme, nuk mund të shkosh në dizavantazh 0-3 në fund të pjesës së parë”, u shpreh ai.
Në fund, ai bëri thirrje që skuadra të mbledhë forcën dhe energjinë për të rikuperuar. “Tani duhet të karikojmë bateritë, të mësojmë nga gabimet dhe të rinisemi”, përfundoi Gjimshiti, i cili është i fokusuar në pjesën tjetër të sezonit dhe objektivat që Atalanta ka në kampionatin italian./UBTNews/